‘हट सिट’मा ‘हट भिडन्त’, वीरगञ्ज महानगर कसको कब्जामा ?

नेत्र पन्थी, एसके यादव र अमित अग्रवाल

वीरगञ्ज । देशको सम्पूर्ण शक्ति अहिले दुई नम्बर प्रदेशमा परिचालित छ । यति मात्रै होइन, यो प्रदेशका आठ जिल्लामा असोज २ गते हुने तेस्रो चरणको स्थानीय तहका लागि ठूला राजनीतिक दलले पनि सबै शक्ति यहाँ केन्द्रित गरेका छन् । यहाँको चुनाव उनीहरुका लागि प्रतिष्ठाको विषय बनेको छ । प्रतिष्ठाको लडाइँमा कोही पछाडि हुन चाहेका छैनन् ।

तेस्रो मधेस आन्दोलनताका सबभन्दा चर्चामा रहेको वीरगञ्जमा नाकाबन्दीको घाउको खाटा अझै बसिसकेको छैन । वीरगञ्जका व्यापारी, उद्योगी तथा अन्य सबै मतदाताले यो स्थानीय चुनावपछि फेरि नाकाबन्दी तथा आन्दोलन झेल्न नपरोस भन्ने चाहेका छन् । तर, अचम्म यो छ कि आन्दोलन हुँदैन, नाकाबन्दी हुँदैन, निर्वाध रुपमा व्यवसायी गर्न पाउन भनी कसैको चुनावी एजेन्डामा छैन ।

वीरगञ्ज दुई नम्बर प्रदेशको एक मात्र महानगरपालिका । यसकारण दुई नम्बर प्रदेशभित्र पनि वीरगञ्जको चुनाव झन् पेचिलो छ । वीरगञ्ज ‘हटसिट’ बनेको छ । ‘हटसिट’मा ‘हट भिडन्त’ हुँदैछ । मधेसको आत्मसम्मानको कुरा चुनावको मनोविज्ञानसँग जोडिएको छ । मधेसी, मुस्लिम, मारवाडी र पहाडी समुदाय रहेको यो ठाउँमा कुन समुदायबाट कसले कति मत तान्न सक्छ ? यो नै चुनावी अङ्कगणितमा निर्णायक हुन सक्छ ।


दलहरुको उम्मेदवार चयनदेखि अहिले प्रचार प्रसारसम्मको खेल हेर्ने हो भने कोही पनि वीरगञ्जलाई गुमाउने मुडमा छैनन् । सबै उम्मेदवारका आआफ्नै चुनावी नारा छन्, आ–आफ्नै एजेन्डा पनि छन् । यहाँ जित निकालेर काङ्ग्रेस, एमाले र माओवादीजस्ता ठूला दललाई तराई मधेसमा बलियो रहेको सन्देश दिन चाहन्छन् भने मधेसवादी दलहरु आफ्नो भूमिमा आफ्नै कब्जाको खोजिमा छन् । तर आन्दोलनमा वीरञ्गजले जति गुमाएको छ्, यो चाहिँ पक्का हो कि स्थानीय तहको चुनावपछि पनि सजिलै पाउने छैन ।

किनभने यहाँको चुनावपछि मधेसमा स्थायित्व हुन्छ कि हुँदैन शङ्काको विषय बनेको छ । यसको ग्यारेन्टी कसैले लिन चाहेका छैन । यहाँसम्म कि महानगरपालिकाको भविष्य बनाउन नेतृत्वमा आउन चाहने मेयरका उम्मेदवारहरुको एजेन्डामा पनि यो कुरा छैन । हालै उपमहानगरपालिकाबाट महानगरपालिका बनेका वीरगञ्जवासी जति खुशी छन्, त्यति नै चिन्तित पनि छन् । कारण छन्, महानगरपालिकामा मेयरका लागि देखिएको भिडन्त । अहिले जति उम्मेदवारले उम्मेदवारी दिएका छन्, कसैले पनि कसैलाई ‘वाह क्या भावी मेयर’ भनेको छैनन् ।