चलचित्र ‘छक्का पञ्जा २’ को ट्रेलर सार्वजनिक

काठमाडौं, २१ भदौ – चलचित्र ‘छक्का पञ्जा २’ को ट्रेलर सार्वजनिक भएको छ । अभिनेता दीपकराज गिरीले निर्माण गरेको चलचित्रलाई दीपाश्री निरौलाले निर्देशन गरेकी हुन् ।

सामाजिक सञ्जाल युट्युबमार्फत ट्रेलर सार्वजनिक गरिएको चलचित्रको ट्रेलरको माध्यमबाट हास्यप्रधान चलचित्रका रुपमा देखाउन खोजिएको छ । दीपकराज गिरी, जितु नेपाल, स्वस्तिमा खड्का, वर्षा राउत, प्रियंका कार्की, स्वरुप पुरुष ढकाल लगायतका कलाकारको अभिनय रहेको चलचित्रको छायांकन पुरुषोत्तम प्रधानले गरेका हुन् ।

चलचित्रमा विकासराज आचार्य र सामीप्यराज तिमिल्सेनाको कथा छ भने दीपकराज गिरीले फिल्मको स्किृप्ट लेखेका छन् । विकासराज आचार्य सह-निर्माता छन् ।

फिल्म यही असोज ११ गतेदेखि देशभर प्रदर्शन हुँदैछ ।