कट्रिनाको हात समातेर खोला तर्ने प्रयासमा गोविन्दा

गोविन्दा कुनै बेला बलिउडका नम्बर १ हिरो मानिन्थे । उनको नामैले फिल्म चल्ने जमाना थियो त्यो । तर, फिल्म इन्डष्ट्रीमा कसैको पनि करिअर एक रफ्तारको हुँदैन र गोविन्दाको पनि भएन ।

पछिल्लो समयमा उनी फ्लप हिरो बनेका छन् । उनले हिट फिल्म नदिएको धेरै भइसक्यो । हालै उनको कमब्याक फिल्म ‘आ गया हिरो’ रिलिज भएको थियो । तर, त्यो फिल्म कहिले पर्दामा आयो र कहिले उत्रियो कमैलाई थाहा छ ।

गोविन्दा आफ्नो गुमेको स्टारडमलाई फेरि जागृत गराउन चाहन्छन् । यसका लागि उनले चल्तिकी हिरोइन कट्रिना कैफको आड खोजेका छन् । आफ्नो मात्रै नामले फिल्म नचल्ने देखेपछि उनले चल्तिको हिरोइन खोजेका हुन् । कट्रिना पनि गोविन्दालाई साथ दिन तयार बनेको स्रोतले जनाएको छ ।

तर फिल्ममा कट्रिनाको छोटो भूमिका रहेको छ । यस फिल्मका लागि उनले १०-१२ दिन दिए पुग्ने निर्माण पक्षले जनाएको छ ।  कट्रिना अभिनित फिल्म ‘जग्गा जासुस’ मा गोविन्दाको छोटो रोल थियो । तर, फिल्म रिलिज हुँदा कुनै कारणले त्यो पनि काटिएछ ।

कट्रिना आगामी दिनमा बलिउडका तीन खान हिरो आमिर, सलमान र शाहरुखसँग ठूला प्रोजेक्टमा काम गर्दैछिन् । आगामी फिल्म ‘टाइगर जिन्दा है’ मा उनले सलमानसँग रोमान्स गरेकी छिन् । यसैगरी आमिर खान र अमिताभ बच्चन अभिनित फिल्म ‘ठग्स अफ हिन्दोस्तान’ मा पनि उनलाई देख्न सकिनेछ । त्यसपछाडि उनी निर्देशक आनन्द एल रायको फिल्ममा शाहरुखसँग स्क्रिन सेयर गर्दैछिन् ।